Дүүргийн мэдээ - Bagakhangai.nutag.mn

"Mercedes-Benz G320" машинтай Хэрлэн голын усанд суусан хоёр иргэнийг татан гаргажээ

zulaa — Thu, 22 Oct 2026 16:10:15 +0800

Багануур дүүргийн 5 дугаар хорооны нутаг Хөдөө хэсгийн Дивизийн гарам хэмээх газарт хоёр зорчигчтой суудлын автомашин Хэрлэн голын усанд живж байна гэсэн дуудлага 2026 оны 10-р сарын 22-ны өдрийн 01:45 цагт иржээ.

Дуудлагын дагуу тус дүүргийн Онцгой байдлын хэлтсийн 64 дүгээр ангийн ээлжийн алба хаагчдыг очиход "Mercedes benz G320" загварын суудлын автомашин “Хэрлэн голын усанд сууж, тус автомашины жолооч А /40 настай, эмэгтэй/, зорчигч Д /32 настай, эрэгтэй/ нар автомашин дотроо байсныг аварч, автомашиныг татан гаргасан гэж ОБЕГ-аас мэдээллээ.

Багахангай-Хөшигийн хөндий-Эмээлт чиглэлийн төмөр зам ашиглалтад орлоо

zulaa — Mon, 12 Oct 2026 09:28:29 +0800

Монгол Улсын Ерөнхийлөгч Ухнаагийн Хүрэлсүх Багахангай-Хөшигийн хөндий-Эмээлт чиглэлийн төмөр замын нээлтэд оролцлоо. Ерөнхийлөгч, бүтээн байгуулалтын төслийг хэрэгжүүлсэн Зам, тээврийн яам, “Монголын төмөр зам” ТӨХК-ийн хамт олон болон оролцсон байгууллага, инженер, техникийн ажилтан, бүтээн байгуулагч нарт төр, ард түмний нэрийн өмнөөс талархал илэрхийлэв.

Өргөн цар хүрээтэй инженерийн байгууламж, төмөр замын дээд, доод бүтцийг монголчууд өөрсдийн хүчээр, үндэсний аж ахуйн нэгжүүд хамтран жил гаруйн хугацаанд барьж, бүтээн байгуулалтын шинэ жишиг тогтоосныг онцоллоо.

Төмөр зам нь Улаанбаатар хот өргөжин тэлэх, дагуул хот болон шинэ суурьшлын бүс бий болох, хурдтай өсөн нэмэгдэж буй экспорт, үйлдвэрлэл, худалдаа, үйлчилгээ, тээврийн хэрэгцээг тогтвортой хангах, хөрөнгө оруулалт болон ажлын байр нэмэгдэх зэрэг ач холбогдолтойг тэмдэглэв. Цаашид хэвийн, найдвартай ажиллагааг нь хангах, үр өгөөжийг дээшлүүлэх, тээврийн хүчин чадлыг нэмэгдүүлэх, тарифын уян хатан бодлого тогтоох, логистикийн зардлыг бууруулах, хүний нөөцийн чадавхыг бэхжүүлэхэд анхаарахыг холбогдох байгууллагуудад чиглэл болголоо. Ерөнхийлөгч У.Хүрэлсүхийн Ерөнхий сайд байхдаа гаргасан санаачилга, бодлогын дэмжлэг өнөөдөр ийнхүү бодит ажил болж байгааг Зам, тээврийн сайд Б.Дэлгэрсайхан хэлсэн үгэндээ онцлов.

Багахангай-Хөшигийн хөндий-Эмээлт чиглэлийн ИйИ зэрэглэлийн төмөр зам 127 км урт, дэлгэмэл урт нь 177 км. 3 зөрлөг, 4 өртөөтэй. Найман байршилд нийт 1,279 урт метр гүүрэн байгууламж барьсан байна. Үүнээс Туул гол дээгүүр 20 тулгуур, 38 дам нуруутай, 476 метр гүүр барьсан нь манай улсын хамгийн урт гүүр болжээ. Мөн төслийн хүрээнд 22 метр өндөр, 176 метр урт гүүр барьсан нь хамгийн өндөрт тооцогдож байна.

Гүүрнээс гадна ус өнгөрүүлэх болон иргэд, тээврийн хэрэгслийг нэвтрүүлэх зориулалттай 127 ширхэг төмөр бетон хоолой барьжээ.

Төмөр зам эхний жилд 20 сая, цаашид 25 сая тн ачааг Улаанбаатар хотыг тойруулан тээвэрлэх бөгөөд энэ нь хоногт дунджаар 1,800 орчим том оврын автомашин хотын хөдөлгөөнд оролцохгүй гэсэн үг юм. Энэ хэрээр хотын дундуур дамжин өнгөрдөг ачаа тээврийн урсгал, төмөр зам, автозам огтлолцдог гол цэгүүдийн ачаалал буурч, түгжрэл багасна.

Тухайлбал, төмөр замын гармуудыг хаахад замын хөдөлгөөн хоногт дунджаар 144 минут саатдаг байсан бол 21-120 минутаар буурна гэсэн тооцоолол гарчээ.

Мөн өнөөдрөөс 34 нэр төрлийн тэсэрч дэлбэрэх болон аюултай ачааг Улаанбаатар хотын төвөөр дамжуулан тээвэрлэхгүй боллоо. Төмөр замын 87.8 дугаар км-т олон төрлийн ачаа тээврийн, 102 дугаар км-т аюултай ачааны нэгдсэн терминал байгуулахаар төлөвлөсөн байна.

Цаашид нийслэлийн нутаг дэвсгэрт үйл ажиллагаа явуулж байгаа ачаа тээврийн 13 терминалыг үе шаттай нүүлгэн шилжүүлж, газрыг нь нийтийн зориулалтаар ашиглахаар төлөвлөжээ.

Энэ төмөр зам Хөшигийн хөндий дэх “Чингис хаан” олон улсын нисэх буудлыг түшиглэсэн тээвэр логистик, худалдаа, үйлдвэрлэл, чөлөөт бүс, дагуул хот хөгжихөд чухал нөлөө үзүүлнэ.

Төмөр замын бүтээн байгуулалтад үндэсний 160 гаруй аж ахуйн нэгж, 4,000 гаруй инженер, техникийн ажилтан, түүний дотор орон нутгийн 1,000 гаруй хүн оролцож, 1,500 гаруй машин механизм, техник, тоног төхөөрөмж ашиглажээ.

Багахангай-Хөшигийн хөндий-Эмээлт чиглэлийн төмөр замын бүтээн байгуулалтыг эрчимжүүлнэ

zulaa — Thu, 04 Jun 2026 15:53:42 +0800

“Монголын төмөр зам” ТӨХК-ийн гүйцэтгэх захирал О.Батчулуунаар ахлуулсан ажлын хэсэг өнөөдөр /2026.05.30/ Багахангай–Хөшигийн хөндий–Эмээлт чиглэлийн төмөр замын төслийн бүтээн байгуулалтын талбайд ажиллаж, ажлын гүйцэтгэлд хяналт тавин, төслийн хэрэгжилтийн явцыг үнэллээ.

Ажлын хэсэг төслийн хэрэгжилтийн явцад тулгамдаж буй асуудлыг газар дээр нь хэлэлцэж, бүтээн байгуулалтын ажлыг эрчимжүүлэх, гарч буй хүндрэл бэрхшээлийг шуурхай шийдвэрлэх чиглэлээр тодорхой үүрэг, чиглэл өглөө.

Багахангай–Хөшигийн хөндий–Эмээлт чиглэлийн төмөр зам нь Улаанбаатар хотыг шинэ нисэх буудалтай холбохын зэрэгцээ тээвэр, логистикийн сүлжээний хүчин чадлыг нэмэгдүүлж, ачаа болон зорчигч тээврийн урсгалыг сайжруулах стратегийн ач холбогдол бүхий томоохон дэд бүтцийн төсөл юм.

Мөн төслийг төлөвлөсөн хугацаанд чанартай, үр ашигтай хэрэгжүүлэн ашиглалтад оруулах зорилтын хүрээнд оролцогч талуудын хамтын ажиллагаа, ажлын уялдаа холбоог улам бэхжүүлж, бүтээн байгуулалтын ажлыг эрчимжүүлэхийг энэ үеэр онцлов.

Халиун бугыг агнасан хэргийг Экологийн цагдаагийн алба шалгаж байна

zulaa — Tue, 28 Apr 2026 13:00:26 +0800

Сэлэнгэ аймгийн Шаамар сумын нутаг дэвсгэрт орших “Устай Шаамар, Хадан хошуу, Тужийн нарсны байгалийн цогцолборт газар”-ын бүсээс ховор амьтны жагсаалтад багтсан хоёр халиун бугыг хууль бусаар агнасан талаарх гомдол, мэдээлэл цагдаагийн байгууллагад бүртгэгджээ.

Дуудлагын дагуу алба хаагчид холбогдох шалгалтын ажиллагааг явуулж байгааг Экологийн Цагдаагийн Албанаас мэдээллээ.

Халиун буга нь Монгол Улсын Засгийн газрын 2012 оны долдугаар тогтоолын нэгдүгээр хавсралтаар батлагдсан ховор амьтны жагсаалтад бүртгэгдсэн бөгөөд уг амьтныг агнах, тээвэрлэх,худалдахыг хуулиар хориглосон байдаг.

Гэмт хэрэг, зөрчлөөс урьдчилан сэргийлэх тухай хуулийн 33 дугаар зүйлийн 33.1.2 дахь хэсэг, мөн Хууль зүй, дотоод хэргийн сайд, Сангийн сайдын 2017 оны А/297, 360 дугаар хамтарсан тушаалаар иргэдээс гэмт хэрэг, зөрчлийн талаарх мэдээллийг төлбөртэй авах зохицуулалттай.

Иймд байгаль орчны эсрэг гэмт хэргийн талаарх мэдээллийг Цагдаагийн байгууллагын 102 болон 70191070 дугаарын утсанд мэдээлж, хамтран ажиллахыг уриаллаа.

Багахангай-Хөшигийн хөндий чиглэлийн төмөр замын төслийн бүтээн байгуулалтыг эрчимжүүлнэ

zulaa — Wed, 22 Apr 2026 15:42:18 +0800

“Монголын төмөр зам” ТӨХК-иас хэрэгжүүлж буй “Багахангай-Хөшигийн хөндий” чиглэлийн төмөр замын төслийн бүтээн байгуулалтын ажил 2025 оны дөрөвдүгээр сарын 25-ны өдөр эхэлсэн.

Өнөөдрийн байдлаар төслийн эхний үе шатны доод бүтцийн ажлын гүйцэтгэл 98 хувьтай, нийт гүйцэтгэл 84 хувьд хүрч, төлөвлөгөөний дагуу урагшилж байна.

Ажлын хэсэг төслийн талбайд ажиллах үеэр хэрэгжилтийн явцад тулгамдаж буй асуудлуудтай танилцаж, цаашид хэрэгжүүлэх ажлын талаар санал солилцлоо.

“Багахангай-Хөшигийн хөндий” чиглэлийн төмөр зам нь Улаанбаатар хотыг шинэ нисэх буудалтай холбох, тээвэр, ложистикийн урсгалыг сайжруулах стратегийн ач холбогдол бүхий томоохон дэд бүтцийн төсөл юм.

Төслийн бүтээн байгуулалтыг эрчимжүүлэх чиглэлээр төлөвлөгөөт ажлуудыг үе шаттай хэрэгжүүлэн ажиллаж байна гэж “Монголын төмөр зам” ТӨХК-иас мэдээллээ.

Багахангайгаас Хөшигийн хөндий хүртэлх төмөр замын барилга угсралтын ажил 90 хувьд хүрсэн гэв

zulaa — Tue, 20 Jan 2026 16:27:29 +0800

Хөшигийн хөндий, Оргоч уул орчим дахь ачаа терминалаас бараа бүтээгдэхүүнийг төвлөрсөн байдлаар түгээх, дэд бүтцийг бүрдүүлэх зорилгоор Багахангай-Хүннү хот чиглэлийн салбар төмөр замын төслийг хэрэгжүүлж буй.

Төмөр зам нь Багахангай өртөөнөөс салаалж Төв аймгийн Сэргэлэн сумын нутгаар дайрч, Хөшигийн хөндий хүртэл 87.2, Хөшигийн хөндий-Шувуун фабрикийн чиглэлд 15.6, нийт 102.8 км үргэлжилнэ.

Багахангай-Хүннү хот чиглэлийн салбар төмөр замын барилга угсралтын ажлыг хоёр үе шаттай гүйцэтгэхээр төлөвлөжээ.

Нэгдүгээр шатанд УБТЗ ХНН-ийн Багахангай өртөөнөөс Хөшигийн хөндийн өртөө хүртэл 87.85 км, хоёрдугаар шатанд үлдсэн 14.95 км төмөр замын бүтээн байгуулалтыг тус тус хэрэгжүүлэх бөгөөд өнөөдрийн байдлаар төслийн нэгдүгээр шатны барилга угсралтын ажил 90 орчим хувьтай үргэлжилж байгааг албаны эх сурвалжууд мэдээлэв.

Харин цаг агаарын нөхцөл байдалтай холбоотойгоор талбайн ажлыг түр зогсоожээ. 2026 оны гуравдугаар сарын 15-наас барилгын ажлыг дахин эхлүүлэх аж. Энэ хүрээнд төмөр замын бүтээн байгуулалтын ажилд оролцож байгаа дотоодын 110 орчим аж ахуйн нэгжийн 2,500 гаруй инженер, мэргэжилтэн талбайн бэлтгэл ажлыг хангаж байгаа аж.

Тус төслийн нэгдүгээр шатны бүтээн байгуулалтын ажлын санхүүжилт 850.4 тэрбум төгрөг байхаар баталсан бөгөөд үүнээс гүйцэтгэлийн төлбөрт 156.2 тэрбум төгрөг шилжүүлжээ.

Налайх, Багануур, Багахангай дүүрэгт шинээр газар эзэмших боломжтой

zulaa — Tue, 13 Jan 2026 10:33:38 +0800

“Шинээр газар эзэмших хүсэлтийг 12 дугаар сарын 31-нээс эхлэн www.egazar.gov.mn цахим системээр хүлээн авч, 1–5 хоногийн хугацаанд шийдвэрлэнэ” гэх мэдээлэл олон нийтийн дунд тархжээ. Үүнд Нийслэлийн газар зохион байгуулалтын албанаас дараах албан ёсны тайлбарыг гаргасан байна. Үүнд:

Монгол Улсын Засгийн Газрын 2024 оны 92 дугаар тогтоолоор батлагдсан Газар зохион байгуулалт хийх журмын 3.24.6-д “тухайн жилийн газар зохион байгуулалтын төлөвлөгөөний төсөлд жил бүрийн эхнээс эхлэн 09 дүгээр сарын 15-ны өдөр хүртэл иргэд, олон нийтээс цахим болон цаасан хэлбэрээр санал авна;” заасан.

Иргэн та шинээр газар эзэмших тухай санал, хүсэлтээ цахимаар гаргах бөгөөд нийслэлийн 9 дүүргээс Налайх, Багануур, Багахангай дүүргийн нутаг дэвсгэрт тухайн жилийн газар зохион байгуулалтын төлөвлөгөөнд тусгуулснаар шинээр газар эзэмших боломжтой юм.

Нийслэл, дүүргийн 2026 оны газар зохион байгуулалтын төлөвлөгөөнд улс, нийслэлийн төсвийн хөрөнгө оруулалт хэрэгжүүлэх төсөл хөтөлбөрүүдийн газар чөлөөлөлтийн нөлөөлөлд өртсөн, нийтийн эрх ашиг болон газар эзэмших, ашиглах эрх нь хөндөгдсөн иргэн, хуулийн этгээдийн эдэлбэр газрыг газраар дүйцүүлэн эзэмшүүлэхээр тусгасан байна.

Газар эзэмших эрхийн гэрчилгээг бусдад шилжүүлэх, газар эзэмших, ашиглах эрхийн хугацаа сунгах зэрэг харилцаатай холбоотой хүсэлтүүдийг www.egazar.gov.mn цахим системээр дамжуулан хүлээн авч, хуульд заасны дагуу 15 хоногийн дотор шийдвэрлэж байна" гэжээ.

"Багахангай-Хөшигийн хөндий" чиглэлийн төмөр замын терминал байгуулах талаар хэлэлцлээ

zulaa — Fri, 31 Oct 2025 14:04:06 +0800

"Монголын төмөр зам” ТӨХК-ийн Гүйцэтгэх захирал О.Батчулуун өнөөдөр БНХАУ-ын Нэгдсэн олон улсын төмөр замын чингэлэг тээврийн компанийн Орлогч захирал Цянь Жун тэргүүтэй төлөөлөгчдийг хүлээн авч уулзлаа. Уулзалтын үеэр хоёр тал төмөр замын чингэлэг тээврийн салбарт хамтран ажиллах боломж, Багахангай–Хөшигийн хөндий чиглэлийн салбар төмөр замын терминал байгуулах талаар санал солилцов. Мөн төлөөлөгчид өнөөдөр Багахангай–Хөшигийн хөндий чиглэлийн салбар төмөр замын бүтээн байгуулалтын явцтай газар дээр нь очиж танилцсан байна. Түүнчлэн Замын-Үүд нарийн царигийн өртөөний шинэ чингэлэг терминал барих төсөл, Хөшигийн хөндийн тээвэр, логистикийн төв байгуулах төслийн хэрэгжилтийн явцыг судалж, цаашид эдгээр төслийн хүрээнд хамтран ажиллах боломжийг талууд ярилцлаа.

Багахангай дүүргээс нийслэл рүү нийтийн тээвэр өнөөдрөөс 07:00 цагаас хөдөлдөг болно

zulaa — Fri, 04 Jul 2025 10:55:49 +0800

Нийслэлийн нутгийн захиргааны байгууллагын ажил эхлэх цагийг 07:00-16:00 болгосон. Уг өөрчлөлттэй холбоотойгоор маргаашаас эхэлж Х:18 Тэнгэр плаза-Багахангай эцсийн зогсоол чиглэлийн өглөөний эх авалтын цагийг 07:00 цаг болгон урагшлуулахаар болжээ. Тодруулбал Багахангай дүүргээс нийслэл рүү нийтийн тээврийн автобус 07:00 цагт хөдлөх юм байна.

АВТОБУСНЫ ЧИГЛЭЛ ЧИГЛЭЛ

Х:18 Улаанбаатар /Тэнгэр плаза/-Багахангай эцсийн зогсоол

ЗОГСООЛ:- Баянзүрх шалган нэвтрүүлэх товчоо, Оргил- Налайх, 86-р үйлдвэр, Багахангай дүүргийн 2-р хорооны зогсоол/

ЦАГИЙН ХУВААРЬ

Багахангайгаас хөдлөх цаг-07:00, 11:40, 16:20
Тэнгэр плазад ирэх цаг-08:50, 13:30, 18:10
Тэнгэр плазагаас хөдлөх цаг-09:20, 14:00, 18:40
Багахангайд ирэх цаг-11:10, 15:50, 20:30.

Уг чиглэлд нийтийн тээврийн автобус гурван удаа явах бөгөөд том хүн 8,000, хүүхэд 4,000 төгрөгөөр зорчино. Энэ оны дөрөвдүгээр сараас Улаанбаатар-Багахангай дүүрэг хооронд нийтийн тээврийн автобус явж эхэлсэн юм.

Багахангай-Хөшигийн хөндийн төмөр замын барилгын ажил эхэлжээ

zulaa — Mon, 09 Jun 2025 09:33:23 +0800

Багахангай-Хөшигийн хөндий чиглэлийн салбар төмөр замын ажлын явцтай танилцаж, бүтээн байгуулалтыг эрчимжүүлэх чиглэлээр "Монголын Төмөр зам" ТӨХК болон гүйцэтгэгч байгууллагуудад үүрэг чиглэл өгөв.

Шинээр баригдаж буй салбар төмөр зам нь Багахангай өртөөнөөс салаалж, Төв аймгийн Сэргэлэн сумын нутгаар дайрч, Хөшигийн хөндий хүртэл үргэлжилнэ.

Нийт 102 км урт дан замтай, гурван өртөө, дөрвөн зөрлөгтэй, 2.5 км урт гүүрэн байгууламжтай байна. Тус бүтээн байгуулалтын ажилд үндэсний 110 орчим аж ахуйн нэгж, байгууллагын 2500 гаруй ажилтнууд оролцох юм байна.

Барилгын ажлыг өнгөрсөн дөрөвдүгээр сарын сүүлчээр эхлүүлж, есдүгээр сард багтаан дуусгах төлөвлөгөөтэй 24 цагаар ажиллаж байна гэж ЗТЯ-наас мэдээлэв.