Спорт - Bagakhangai.nutag.mn

Паралимпын мөнгөн медалиас Азийн наадмын алтан медаль хүртсэн Г.Болор-Эрдэнэ

zulaa — Fri, 23 Oct 2026 18:16:16 +0800

Тамирчин хүний амжилтыг зөвхөн хүртсэн медалийн өнгөөр хэмжих боломжгүй. Түүний ард туулсан зам, даван гарсан саад бэрхшээл, өдөр бүр өөрийгөө ялан дийлэхийн төлөөх тэмцэл бий. Ялангуяа пара спортын тамирчдын хувьд ялалт гэдэг өрсөлдөгчөө ялахаас гадна өөрийн боломжийн хязгаарыг тэлж, бусдад итгэл найдвар бэлэглэхийн нэр юм. Тиймээс тэдний амжилт спортын талбайгаас хальж, нийгэмд урам зориг түгээдэг билээ. Энэ удаагийн “Амжилтын эзэн” буландаа бид Монголын пара таеквондогийн тамирчин, Парисын паралимпын мөнгөн медальт Г.Болор-Эрдэнийг онцолж байна. Тэрбээр тивийн дэвжээнд ур чадвар, тэсвэр хатуужлаа харуулж, Азийн наадмын алтан медалийн эзэн боллоо. Түүний энэхүү амжилт Монголын спортын бахархлыг нэгээр нэмээд зогсохгүй олон улсын тавцанд эх орныхоо нэрийг өндөрт өргөсөн үнэ цэнтэй үйл явдал байв.

Бага насны сахилгагүй хүүгээс дэлхийн аварга хүртэл

Түүний бага нас Сүхбаатар аймагт өнгөрчээ. Тэрбээр өөрийн ярилцлагадаа багадаа хөдөлгөөнтэй, сахилгагүй хүүхэд байсан тухайгаа дурдсан байдаг. Харин таеквондогийн спортоор хичээллэж эхэлснээр амьдралынх нь хандлага өөрчлөгдөж, спорт хүнийг хүмүүжүүлж, төлөвшүүлдэг гэдгийг өөрийн биеэр мэдэрсэн байна.

2008 онд Сүхбаатар аймгийн “Эхлэл” клубт таеквондогоор хичээллэж эхэлсэн тэрбээр анхны тэмцээндээ оролцсон даруйдаа мөнгөн медаль хүртжээ. Тэрхүү эхний амжилт цаашдын замналынх нь эхлэл болсон юм.

Анхны дасгалжуулагч Н.Нэргүйгийн удирдлага дор бэлтгэлээ үргэлжлүүлж, олон улсын таеквондогоор зургаан жил хичээллэсний дараа 2015 оноос пара таеквондогийн төрөлд хүч сорих болжээ. Түүний хувьд спорт зөвхөн өрсөлдөх талбар байгаагүй. Харин өөртөө зорилго тавьж, түүнийхээ төлөө тууштай хөдөлмөрлөх итгэлийг өгсөн орчин байв. Г.Болор-Эрдэнэ нэг ярилцлагадаа таеквондо өөрийг нь урам зориг, хүсэл мөрөөдөл, тэмүүлэлтэй болгосон тухай ярьсан байдаг.

Мөнгөн медалиас алтан оргил өөд

Өндөр түвшний спортод амжилт гаргана гэдэг нэг удаагийн ялалтын хэрэг биш. Харин бэлтгэл сургуулилалт, сахилга бат, сэтгэл зүйн бэлтгэл, өрсөлдөгчөө судлах ухаан гээд олон хүчин зүйлийн нэгдэл юм. Тэр дундаа таеквондо шиг хором бүрд шийдвэр гаргаж, өчүүхэн боломжийг ч оноо болгон хувиргах шаардлагатай спортод тамирчны төвлөрөл, тактикийн мэдрэмж онцгой чухал. Г.Болор-Эрдэнэ Парисын паралимпын наадмаас мөнгөн медаль хүртсэн амжилтаараа дэлхийн хэмжээний өрсөлдөөнд хүчтэй өрсөлдөх чадвартайгаа хэдийнэ харуулсан. Харин энэ удаа тивийн дэвжээнд тэр амжилтаа ахиулж, алтан медаль хүртсэн нь түүний спортын замналын онцлох хуудсуудын нэг боллоо. Паралимпын мөнгөн медаль бол тамирчны ур чадвар, хөдөлмөрийн томоохон илэрхийлэл. Харин түүний дараа Азийн наадамд түрүүлсэн нь амжилтаа хадгалахын зэрэгцээ шинэ зорилго өөд тэмүүлж буйн илрэл юм. Өмнөх амжилтдаа сэтгэл ханалгүй, дараагийн сорилтод өөрийгөө бэлтгэх нь шилдэг тамирчдыг бусдаас ялгаруулдаг чанар билээ.

Шийдвэрлэх тулаанд харуулсан ур чадвар

Г.Болор-Эрдэнэ пара таеквондогийн эрэгтэйчүүдийн К44 ангиллын -63 кг-ын жинд өрсөлдсөн юм. Аваргын төлөөх замнал нь амар байгаагүй. Тэрбээр эхлээд Казахстаны Айбек Жумангалиг ялж, улмаар хагас шигшээд Ираны Саейд Садегианпурыг буулган авснаар финалд шалгарсан юм. Ийнхүү аваргын төлөөх тулаанд Узбекистаны Кудратжон Хайдаровтай учраа таарсан Г.Болор-Эрдэнэ өрсөлдөгчөө 2:1-ий харьцаатай ялсан юм. Тэрбээр өмнө бидэнд өгсөн ярилцлагадаа “Би дэвжээнд гарахаасаа өмнө тайван байж, анхаарлаа төвлөрүүлэхийг илүүд үздэг. Бэлтгэлийнхээ үр дүнг гаргах ёстой гэсэн сэтгэл зүйтэй байдаг. Би ямар тэмцээндээ өрсөлдөх гэж байгаагаасаа шалтгаалаад бэлтгэлээ тааруулдаг. Ер нь өдөрт дунджаар 2-3 бэлтгэл хийж байна. Жирийн үед ойрын зорилгоо хардаг. Шигшээ багийн ах нараасаа үргэлж суралцдаг. Тэмүүжин, Түмэнбаяр, Шинэбаяр гээд ах нар бий. Ах нарынхаа уужуу байдлыг хараад амар амгаланг мэдэрдэг. Хүн ийм зантай, тайван байх ёстой гэдгийг суралцдаг. Тэмүүжин ах “Рио-2014” олимпод амжилттай оролцсон. Түмэнбаяр ах гэхэд бэлтгэлийг яс хийдэг их хариуцлагатай. Хүн ингэж хөдөлмөрлөх ёстой гэдгийг олж хардаг” тухайгаа хэлж байсан. Тиймдээ ийнхүү пара таеквондогийн дэвжээнд Монголын төрийн далбааг өндөрт өргөж, эх орныхоо медалийн буухианд алтан өнгө нэмэв.

Нэг тамирчны ялалт, Монголын спортын бахархал

Спортын амжилт хувь хүний хөдөлмөрөөс эхэлдэг ч түүний үнэ цэн олон хүнд хүрч байж улам тодордог. Тив, дэлхийн тэмцээнд түрүүлсэн тамирчин эх орныхоо нэрийг дуурсгахаас гадна дараагийн үеийнхэнд зорилго тавих, түүндээ тууштай хүрэхийн үлгэр дуурайл болдог.

Г.Болор-Эрдэнийн амжилтыг ч энэ өнцгөөс харах учиртай. Парисын паралимпын мөнгөн медаль, Азийн наадмын алтан медаль нь түүний олон улсын тэмцээнүүдэд гаргасан амжилтыг илтгэхийн зэрэгцээ Монголын пара таеквондогийн хөгжлийг төлөөлж байна.

Пара спортын тамирчдын медаль бүр өөрийн гэсэн түүхтэй. Мөнгөн медаль нь дараагийн зорилгын эхлэл болж, алтан медаль нь хөдөлмөрийн үнэ цэнийг баталдаг. Харин жинхэнэ амжилт гэдэг тэнд хүрээд зогсох бус, цаашид ч өөрийгөө сорих зориг юм. Г.Болор-Эрдэнийн тивийн аваргын алтан медаль энэ замналынх нь нэгэн тод хуудас болон үлдэж, Монголын пара спортын бахархлын нэг хэсэг болон бичигдлээ. Тиймдээ ч ирэх “Лос-Анжелес-2028” паралимпын наадамд өмнөх ярилцлагынхаа алтан медаль хүртэх хүслээ гүйцээх буй биз ээ.

Д.Дарамбазар

Эх сурвалж: “Зууны мэдээ” сонин

Азийн пара наадам: Монголын тамирчид медалийн хур буулгалаа

zulaa — Wed, 21 Oct 2026 16:18:03 +0800

"Айчи Нагоя 2026" Азийн пара наадам өнгөрсөн Ням гаригт албан ёсоор эхэлсэн. Энэ удаагийн наадамд Азийн олимпын зөвлөлийн 45 гишүүн орны 2,590 тамирчин спортын 19 төрлөөр 489 багц медалийн төлөө өрсөлдөж байна.

Наадмын нээлтэд Японы эзэн хаан Нарүхито оролцож, наадам нээснийг зарласан. Мөн Японы паралимпын аварга, медальтнууд галт бамбарыг тулганд асаасан билээ.

Монгол Улсаа төлөөлөн нийт 45 тамирчин арлын орныг зорьсон. Тэгвэл өчигдөр/2026.10.19/ наадмын албан ёсны эхний өдөр баг тамирчид нэг алт, нэг мөнгө, нэг хүрэл медаль хүртлээ.

Т.СУВД-ЭРДЭНЭ МӨНГӨН МЕДАЛЬ

Тодруулбал, пара жүдогийн эмэгтэйчүүдийн -52 кг-ын жинд Т.Сувд-Эрдэнэ мөнгөн медаль. Өдгөө 24 настай тэрбээр эхний тойрогтоо Индонезийн Новиа Ларассатиг, хагас шигшээд Казахстаны Тлеккабыл Альфияаг тус тус ялж, мөнгөн медалийн болзол хангажээ. Харамсалтай нь, финалд Японы Шизүка Хангаид дийлдсэн аж.

У.СҮРЭНЖАВ АЛТАН МЕДАЛЬ

Харин пара таеквондогийн -52 кг-ын жинд Хөдөлмөрийн баатар, Парисын паралимпын аварга У.Сүрэнжав таамаг ёсоор түрүүллээ. Өдгөө 26 настай тэрбээр эхний шатандаа Индонезийн Риа Юлиантиг, хагас шигшээд Хятадын Шао Чианыг улмаар финалд Узбекистаны Умида Мамараджабоваг тус тус ялжээ. Түүний Ази төдийгүй дэлхийн дэвжээнд буулган авна гэдэг хэцүү даалгавар болсон бололтой.

Х.ТЕМИРБЕК ХҮРЭЛ МЕДАЛЬ

Тэгвэл пара таеквондогийн төрөлд Х.Темирбек хүрэл медаль хүртсэн. 24 настай залуугийн хувьд эхний шатандаа Ираны Мохаммадтаха Хассанпурт ялагдсан ч дагах тулаандаа Афганистаны Али Сажад Хамразыг ялж, хүрэл медалийн төлөө Японы Мицүяа Танакаг ялжээ.

Ийнхүү эхний өдөр хүртсэн гурван медалийнхаа чанар, тоогоор Монголын тамирчид багийн дүнгээр аравдугаар байрт явж эхэллээ.

ГЭРЭЛ ЗУРГИЙГ Ж.АДИЛБИШ, М.МӨНХЗУЛ, Х.МӨНХБИЛЭГ

Зөрчил гаргасан бөхчүүдээс тайлбар сонсоно

zulaa — Wed, 14 Oct 2026 16:37:22 +0800

МҮБХ зарим бөхчүүдэд тайлбар ирүүлэх албан шаардлага хүргүүлсэн талаар бид өмнө мэдээлсэн. Тодруулбал, Тулгар төрийн 2235, Их Монгол Улс байгуулагдсаны 820, Үндэсний эрх чөлөө, тусгаар тогтнолоо сэргээн мандуулсны 115, Ардын хувьсгалын 105, Ардчилсан хувьсгалын 36 жилийн ойн Үндэсний их баяр наадмын хүчит бөхийн барилдаанд бүртгүүлсэн боловч барилдаанд ирээгүй бөхчүүдэд ийнхүү шаардлага хүргүүлсэн юм.

Мөн аймаг, дүүргийн баяр наадамд бүртгүүлэн барилдсан ч барилдааны явцад орхиж явсан бөхчүүдтэй холбоотой гомдол, санал МҮБХ-нд иржээ. Тус холбооны зүгээс эдгээр үйлдлийг барилдах хүсэл, эрмэлзэлтэй бусад бөхчүүдийн боломжийг хязгаарласан, наадамчин олныг үл хүндэтгэсэн үйлдэл гэж үзсэн байна.

Тэгвэл энэ үйлдлийнх нь талаарх тайлбарыг 2026 оны аравдугаар сарын 10-ны өдрийн дотор хүлээн авсан байна. Дурдсан хугацаанд албан тайлбараа ирүүлсэн бөхчүүдтэй Лхагва гаригт буюу 2026 оны аравдугаар сарын 14-ний өдөр 15:00 цагт уулзаж, сонсох ажиллагаа зохион байгуулахаар болсон гэдгийг Үндэсний бөхийн холбооноос мэдээллээ.

Улсын баяр наадамд бүртгүүлсэн боловч барилдаагүй бөхчүүд

Улсын харцага Г.Батбаяр /Ар/
Улсын начин Б.Баатарцол /БӨ/
Аймгийн арслан О.Өлзиймөнх /Ду/
Аймгийн арслан Т.Мягмаржав /Ув/
Аймгийн арслан Ж.Батбилэг /Тө/
Аймгийн заан Б.Түвшинтулга /Дог/
Аймгийн заан М.Баярмандах /Сэ/
Аймгийн харцага Ч.Дагвадорж /ГА/
Аймгийн начин Б.Баяраа /Ар/
Аймгийн начин Б.Баатарболд /Сэ/
Аймгийн начин Ш.Билгүүндалай /Ор/
Аймгийн начин М.Балжинням /ГА/
Аймгийн начин П.Цэвэгжав /Ув/
Аймгийн начин Б.Гүррагчаа /Тө/
Аймгийн начин Б.Билгүүнтөгс /Ув/
Аймгийн начин О.Ерболсын /БӨ/
Аймгийн начин Ц.Чагнаадорж /Бу/
Аймгийн начин Б.Бэх-Очир /Бу/
Сумын заан Л.Гансүх /Хэ/
Сумын заан Н.Эрхэмбаатар /ГС/
Сумын заан Е.Абылай /БӨ/
Сумын заан Ц.Энхбаяр /ГА/
Сумын заан А.Анхбаяр /Төв/
Сумын заан Ж.Балжинням /Ар/
Сумын заан Э.Энхцаг /Ар/
Сумын заан Д.Батсүх /Тө/
Сумын заан Э.Батлхагва /Хө/
Сумын заан С.Тэмүүлэн /ГА/
Сумын заан Ч.Эрдэнэбаяр /Өв/
Сумын заан Н.Мягмарсүрэн /Ар/
Сумын заан Б.Лхагваа /За/
Сумын заан Д.Худабек /БӨ/
Сумын заан Д.Дашзэвэг /Өв/
Сумын заан П.Нэмэх /ГА/
Сумын заан Т.Түвшинжаргал /Өв/
Сумын заан Ц.Отгонбаяр /Хо/
Сумын заан Ц.Түмэндэмбэрэл /ГА/
Сумын заан, аймгийн арслан Г.Түвшинтөр /За/
Сумын заан Ц.Дэлгэрмөрөн /БӨ/
Сумын заан Д.Бадам-Очир /Ув/
Сумын харцага Б.Энэрэл /За/
Сумын начин, сумын заан О.Одбаяр /Тө/
Сумын начин Ц.Буянтогтох /Тө/
Сумын начин Т.Сумьяабазар /ГА/

Аймаг, дүүргийн наадамд барилдаад, дундаас нь орхиж явсан бөхчүүд

Багахангай дүүргийн баяр наадамд:

Улсын заан Ц.Мягмарсүрэн – дөрвийн даваанд
Улсын начин Г.Дармаажанцан – дөрвийн даваанд
Аймгийн арслан Б.Тайван /Хо/ – дөрвийн даваанд
Аймгийн арслан Б.Даваадалай /Хо/ – дөрвийн даваанд
Аймгийн арслан Х.Болдбаатар /За/ – дөрвийн даваанд

Дархан-Уул аймгийн баяр наадамд:

Аймгийн хурц арслан С.Очирбат /Да/ – тавын даваанд
Аймгийн хурц арслан, улсын начин Б.Өсөхбаяр – тавын даваанд

Японы Формула-1 тэмцээнд Антонелли түрүүллээ

zulaa — Thu, 02 Apr 2026 10:33:05 +0800

Японы "Формула-1"-ийн Гран При тэмцээн гуравдугаар сарын 29-нд Сүзүка тойрог замд болж, Италийн залуу нисгэгч Андреа Кими Антонелли түрүүллээ.

Мерседес багийн нисгэгч Антонелли уралдааны эхэнд байр алдаж зургаадугаар байр хүртэл ухарсан ч уралдааны дунд үеэр аюулгүйн машины горим ашигласан стратегийн давуугаар дахин тэргүүлж, улмаар 13 секунд гаруй давуугаар барианд орсон байна. Энэ ялалт нь түүний улирлын дараалсан хоёр дахь ялалт болж, аваргын онооны хүснэгтийг тэргүүлэх боломж бүрдүүлжээ.

Хоёрдугаар байрт Макларен багийн Оскар Пиастри орсон бол гуравдугаар байрт Феррари багийн Шарль Леклер барианд орсон байна. Харин Жорж Рассел дөрөвдүгээр байр эзэлж, Ландо Норрис тавдугаар байрт оржээ. Өмнөх улирлын аваргуудын нэг Макс Ферстаппен энэ удаа наймдугаар байрт барианд орсон байна.

2026 оны улирлын эхний гурван уралдааны дараа Мерседес баг хүчтэй эхлэл үзүүлж, залуу нисгэгч Антонелли аваргын онооны төлөөх тэргүүлэгчдийн нэг болж эхэллээ.

Ийнхүү Японд болсон "Формула-1" тэмцээн залуу нисгэгчийн ялалтаар өндөрлөснөөр 2026 оны улирлын аваргын төлөөх өрсөлдөөн улам ширүүсэх дохио боллоо.

Японы Сүзүка тойрог зам нь "Формула-1" тэмцээний хувьд хамгийн хүнд замуудын нэгт тооцогддог. Наймын тооны хэлбэрийн бүтэцтэй, нарийн эргэлтүүд хосолсон энэ зам нисгэгчдийн ур чадвар, багуудын стратегийг хамгийн их сорьдог гэдгээрээ алдартай.

NBA-ийн тамирчин, дасгалжуулагч хууль бус мөрийтэй тоглоомын хэрэгт холбогдлоо

zulaa — Fri, 24 Oct 2025 18:20:35 +0800

АНУ-ын Холбооны мөрдөх товчооноос өчигдөр спорт, тэр дундаа сагсан бөмбөг сонирхогчдын дунд шуугиан тарьсан мэдэгдэл хийлээ. Холбооны мөрдөх товчооны дарга Кэш Пэтел өчигдөр хийсэн хэвлэлийн хурал дээр хууль бус мөрийтэй тоглоом, бооцоо зохион байгуулж олон арван сая ам.доллар угааж, олон хүнийг хохироосон гэмт хэргийн талаар танилцуулсан байна.

Холбооны мөрдөх товчоо хэргийг илрүүлэхийн тулд удаан хугацаанд ажилласан гэдгийг дурдлаа. Мөрдлөг шалгалт, ажиллагааны дүнд хууль бус мөрийтэй тоглоом, бооцоо зохион байгуулж мөнгө угааж, луйвар хийсэн 34 хүний нэрийг зарласан байна. Ажиллагааг АНУ-ын 50 мужийн 11-т нь явуулжээ.

Уг гэмт хэрэгт мафийн бүлгийн гишүүдээс гадна Америкийн Үндэсний сагсан бөмбөгийн холбоо NBA-ын тамирчин, дасгалжуулагч холбогдсон байна. Майами Хит багийн тамирчин Терри Розьер, Портланд Трэйл Блэйзерсийн дасгалжуулагч Чонси Биллапс нар Холбооны мөрдөх товчооны мөрдөгчдийн хэдэн жилийн турш мөрдлөг шалгалт хийсэн гэмт хэрэгт буруутгагдаж байна.

Энэ жил 31 настай сагсанбөмбөгчин Розьер хууль бус бооцоо зохион байгуулсан NBA-ийн бусад таван тамирчны хамт баривчлагдсан байна. Харин 2021 оноос хойш Портланд Трэйл Блейзерс багтай ажиллаж байгаа Биллапс хууль бус мөрийтэй тоглоомын хэргээр баригдсан мафийн гишүүд, зодог тайлсан тамирчид гээд гэм буруутайд тооцогдсон 30 гаруй хүнийг нэг болжээ.

Прокуроруудын хэлж байгаагаар энэ хэрэгт Нью-Йоркод байдаг гэмт хэргийн таван том бүлэглэлийн дөрөв нь холбогдсон байна.

Гэмт хэрэгтнүүд хууль бус мөрийтэй тоглоом зохион байгуулахдаа харааны тусгай контакт линз, нүдний шил, тусгай төхөөрөмжөөр нэвт харагддаг ширээ зэргийг ашиглаж тусгай тэмдэглэгээтэй хөзөр, тоглогчийн мэдээллийг авч байсныг тогтоожээ.

Уг мэдэгдлийн дараа Америкийн Үндэсний сагсан бөмбөгийн холбоо Розьер болон Биллапс нарыг нэн даруй холбооны бүрэлдэхүүнээс гаргасан байна. Холбооны зүгээс “бид Холбооны мөрдөх товчооны мэдэгдлийг маш нухацтайгаар хүлээж авсан бөгөөд аливаа тэмцээн уралдааны үнэнч шударга байдал бидний тэргүүн зорилт байх болно” гэж мэдэгджээ.

Одоогоор Розьерын өмгөөлөгч Холбооны мөрдөх товчоо болон бусад прокуроруудын тулгаж байгаа хэрэгт ямар ч холбоо хамааралгүй гэж мэдэгдээд байна. Тэр мөрийтэй тоглоом зохион байгуулагч биш бөгөөд үүний эсрэг тэмцэхээсээ айхгүй байгаа гэжээ.

Хэрэгт холбогдон баривчлагдаад байгаа этгээдүүдийн шүүх хурал орон нутгийн цагаар пүрэв гарагийн орой эхэлжээ.

"Астана дэлхийн цом-2025" тэмцээнээс мөнгөн медаль хүртлээ

zulaa — Tue, 21 Oct 2025 09:40:34 +0800

Казакстан улсын Астана хотноо зохион байгуулагдсан гардан тулааны аварга шалгаруулах "Астана дэлхийн цом-2025" тэмцээний өөрийгөө хамгаалах төрөлд ДХИС-ийн Онцгой байдлын сургуулийн 633 дугаар дамжааны сонсогч М.Бат-Эрдэнэ 80 кг-ийн жинд мөнгөн медаль хүртлээ.

Тэмцээнд Монгол Улсаа төлөөлөн Дотоод хэргийн их сургуулийн Биеийн тамир, албаны бэлтгэлийн институтийн ахлах багш, дэд хурандаа Х.Оналбек дасгалжуулагчтай 11 тамирчин оролцсон байна.

Баг тамирчид тус тэмцээний өөрийгөө хамгаалах болон тулааны төрлөөс 2 алт, 4 мөнгө, 7 хүрэл нийт 13 медалийг хүртсэн амжилтыг үзүүлсэн юм.

Г.Золбаяр Монголын тусгай олимпын хороо дөрөв дэх элч боллоо

zulaa — Fri, 10 Oct 2025 10:38:49 +0800

Монголын тусгай олимпын хороо дөрөв дэх элч Ганбаатарын Золбаяр боллоо. Тэрбээр олон улсын шүүгч бөгөөд Монголын волейболын холбооны шүүгчдийн зөвлөлийн дарга, Зүүн Азийн волейболын холбооны шүүгчдийн зөвлөлийн гишүүн юм. Г.Золбаяр Монголын тусгай олимпын хөдөлгөөнд волейболын спортыг түгээн дэлгэрүүлж, “хамтарсан волейбол”-ыг хөгжүүлэхийн төлөө өөрийн мэдлэг, ур чадвараараа хувь нэмрээ оруулж яваа.

Г.Золбаяр Польш Улсын Катовице хотноо 2025 оны аравдугаар сарын 4-9-ний өдрүүдэд болох тусгай олимпын хамтарсан волейболын дэлхийн цомын тэмцээнд уригдсан байгаа. Монголын тусгай олимпын баг тамирчдыг дэмжин ажиллах юм.

Зүүн Азийн аваргаас эмэгтэйчүүд 2 алт, 2 мөнгө, 2 хүрэл медаль хүртлээ

zulaa — Thu, 02 Oct 2025 14:44:14 +0800

Өмнөд Солонгосын Жонжу хотноо Зүүн Азийн аварга шалгаруулах жюү жицүгийн тэмцээн үргэлжилж байна. Зүүн Азийн аварга шалгаруулах тэмцээний насанд хүрэгчдийн ангилалд манай тамирчид өчигдөр медаль хүртлээ.

Медаль хүртсэн тамирчид:

45 кг-ын жинд “Гаруда” академийн тамирчин Б.Одгэрэл алт.

57 кг-ын жинд “Гүмүда Констракшн” ХХК, “Гаруда” академийн тамирчин Г.Монголжин алт.

57 кг-ын жинд “Шинэсэгэ мед” ХХК, “JUMP” академийн тамирчин Б.Наранхишиг мөнгө.

63 кг-ын жинд “JUMP” академийн тамирчин Г.Батцэцэг мөнгө.

52 кг-ын жинд “JUMP” академийн тамирчин Б.Эгшиглэн хүрэл.

70 кг-ын жинд “Маслов Триангл” ХХК, “JUMP” академийн тамирчин О.Мөнхжаргал хүрэл медаль тус тус хүртээд байна.

“Khan Cup” 3х3 сагсан бөмбөгийн тэмцээний улсын аваргууд тодорлоо

zulaa — Wed, 03 Sep 2025 13:13:34 +0800

ХААН Банкны нэрэмжит “Khan Cup” 3х3 сагсан бөмбөгийн тэмцээний финалын шат буюу улсын аварга шалгаруулах тэмцээн өнгөрсөн бямба гарагт Үндэсний соёл амралтын хүрээлэнд амжилттай болж өндөрлөлөө. Тус тэмцээнд орон нутгийн таван бүс болон нийслэлээс тодорсон эрэгтэй, эмэгтэй нийт 24 баг аваргын төлөө хурд хүч, авхаалж самбаагаа сорин өрсөлдсөн юм.

Монголын хамгийн том банкны хувьд ХААН Банк нийгмийн хариуцлагын хүрээнд хүүхэд, залуусын чөлөөт цагийг зөв боловсон өнгөрүүлэх, эрүүл мэнд, бие бялдрын хөгжил, багийн спортыг дэмжих зорилгоор 2021 онд 21 аймаг, Зүүнхараа, Замын-Үүд болон нийслэлийн 8 дүүрэгт 3х3 сагсан бөмбөгийн жишиг талбайг байгуулсан бөгөөд жил бүр улсын хэмжээнд энэхүү тэмцээнийг уламжлал болгон зохион байгуулж ирсэн билээ.

Улсын аварга шалгаруулах тэмцээний эрэгтэй ангилалд Дорноговь аймгийн 2-р сургуулийн баг тамирчид тэргүүн байр эзэлж, удаах байруудад Чингэлтэй дүүргийн “Show time” болон Ховд аймгийн “Ховд Азза” багууд шалгарлаа. Харин эмэгтэй ангилалд Чингэлтэй дүүргийн “DIP” баг түрүүлж, Багануур дүүргийн “RAIDS1” болон Сэлэнгэ аймгийн Ерөө сумын багууд хоёр, гуравдугаар байр эзэллээ. Аварга болсон баг тамирчид мөнгөн урамшууллаас гадна өчигдөр Монголын 3х3 сагсан бөмбөгийн шигшээ багтай хамтарсан бэлтгэл хийсэн юм.

Энэ жилийн тэмцээнийг Монголын 3х3 сагсан бөмбөгийн холбоотой хамтран олон улсын стандартын дагуу, илүү өргөн цар хүрээтэйгээр зохион байгуулснаараа онцлог бөгөөд орон даяар нийт 510 багийн 2000 гаруй хүүхдийг хамруулсан юм.

ХААН Банк Монголын сагсан бөмбөгийн спортыг байнга дэмжсээр ирсэн. Тодруулбал, 2015 оноос хойш NBA-ийн шууд дамжуулалтыг Монголын үзэгчдэд хүргэхэд ерөнхий ивээн тэтгэгчээр ажиллаж байсны дээр 2024-2025 оны Оюутны лигийг дэмжин ажилласан билээ. Мөн өнгөрсөн онд Монголын сагсан бөмбөгийн дээд лигийн “Бишрэлт Металл” багтай хамтран ажиллах санамж бичиг байгуулж, ивээн тэтгэгчээр ажиллаж байна.

Спортын өсөлтийг дэмжигч – ХААН Банк

“Khan Cup” 3х3 сагсан бөмбөгийн тэмцээний ялагчид бямба гарагт тодорно

zulaa — Thu, 28 Aug 2025 16:29:14 +0800

ХААН Банкны нэрэмжит “Khan Cup” 3х3 сагсан бөмбөгийн тэмцээний 2 дахь шат буюу Бүсийн аварга шалгаруулах тэмцээний албан ёсны нээлтийн арга хэмжээ Үндэсний соёл амралтын хүрээлэнд өнөөдөр боллоо. Энэхүү нээлтийн ёслолд аймаг аймгаас шалгарсан шилдэг баг тамирчид хүрэлцэн ирснээс гадна ХААН Банкны Гүйцэтгэх захирал, НҮБ-ын Хүүхдийн сангийн үндэсний элч Р.Мөнхтуяа, НҮБ-ын Хүүхдийн сангийн суурин төлөөлөгч Эваристе Коуасси-Комлан болон Монголын 3х3 сагсан бөмбөгийн холбооны Ерөнхий нарийн бичгийн дарга С.Төгсжаргал нар оролцлоо. Мөн ХААН Банк өнгөрсөн оноос ивээн тэтгэн хамтран ажиллаж буй Монголын сагсан бөмбөгийн дээд лигийн “Бишрэлт Металл” багийн тамирчид хүүхдүүдийг дэмжихээр хүрэлцэн ирсэн нь онцлог байлаа.

Үндэсний хэмжээний хамгийн том банкны хувьд ХААН Банк нийгмийн хариуцлагын хүрээнд хүүхэд залуусын чөлөөт цагийг зөв боловсон өнгөрүүлэх, эрүүл мэнд, бие бялдрын хөгжлийг дэмжих, багийн спортыг хөгжүүлэхэд хувь нэмэр оруулах үүднээс 2021 онд 21 аймаг, Зүүнхараа, Замын-Үүд болон нийслэлийн 8 дүүрэгт 3х3 сагсан бөмбөгийн жишиг талбай байгуулсан бөгөөд жил бүр ХААН Банкны нэрэмжит 3х3 сагсан бөмбөгийн тэмцээнийг аймаг бүрд зохион байгуулдаг уламжлалтай болсон билээ. Энэ жилийн хувьд ХААН Банк Монголын 3х3 сагсан бөмбөгийн холбоотой хамтран уг тэмцээнийг олон улсын стандартын дагуу, илүү өргөн цар хүрээнд зохион байгуулж, орон даяар нийт 510 багийн 2000 гаруй хүүхдийг хамруулснаараа онцлог юм.

ХААН Банкны Гүйцэтгэх захирал Р.Мөнхтуяа тэмцээний нээлтийн үеэр “Багийн спорт гэдэг хамтдаа ялалт байгуулах урам зориг, хамтдаа хичээх тэсвэр хатуужил, хамтдаа ялах, ялагдахын сургамжийг өгдөг. Манай банкны уриа үг ХАМТЫН ӨСӨЛТ ТӨГӨЛДӨР. Энэ уриатай багийн спортын зорилго мөн нийцдэг гэж бодож байна. Хамтдаа илүү хол алхана, илүү хүчтэй байна, илүү амжилт үзүүлнэ. Тиймээс бид багийн спортыг дэмжихийг зорьж, түүгээр дамжуулж, хүүхэд залууст хамтдаа олон олон ялалт байгуулж, өсөж хөгжих, эх орныхоо нэрийг тив дэлхийд дуурсгах ирээдүйн аваргуудын өсөж өндийх хөрсийг бэлдэж байна гэж үзэж байна” гэлээ.

ХААН Банкны нэрэмжит “Khan Cup” 3х3 сагсан бөмбөгийн тэмцээний 2 дахь шат буюу Бүсийн аварга шалгаруулах тэмцээний ялагчид энэ сарын 29-нд тодрох бөгөөд орон нутгийн 5 бүс болон нийслэлээс шалгарсан нийт эрэгтэй, эмэгтэй 24 баг 8-р сарын 30-нд улсын аваргын төлөө хүч сорих юм.

Тэмцээний нийт шагналын сан 150 сая төгрөг. Бүсийн аварга шалгаруулах тэмцээний 1-р байр 2 сая, 2-р байр 1 сая, 3-р байр 700 мянган төгрөгийн шагналтай бол финалын шатанд аваргын цомын эзэн болох баг 5 сая, 2-р байр 3 сая, 3-р байр 1 сая төгрөгийн шагнал хүртэх юм. Мөн үүнээс гадна ХААН Банк Монголын 3х3 сагсан бөмбөгийн холбоотой хамтын ажиллагааны хүрээнд тэмцээний аварга баг тамирчдыг шигшээ багтай хамтарсан бэлтгэлд хамруулах боломжийг бүрдүүлэх, их дээд сургуульд элсэн суралцахад нь дэмжлэг үзүүлэх зэргээр Монголын сагсан бөмбөгийн спортыг бүх түвшинд тогтвортой дэмжихээр зорьж байна.

Спортын өсөлтийг дэмжигч – ХААН Банк