Дэлхий дахинд - Bagakhangai.nutag.mn

Дэлхийн Хоёрдугаар дайны үеийн бөмбөгийг дэлбэлэхийн тулд Парисын мянга мянган оршин суугчийг нүүлгэн шилжүүлжээ

zulaa — Wed, 22 Apr 2026 17:06:01 +0800

Парис хотын нэг дүүргээс олдсон Дэлхийн Хоёрдугаар дайны үеийн дэлбэрээгүй бөмбөгийг аюулгүй болгох ажиллагаа Ням гарагт амжилттай болж өнгөрчээ.

Бөмбөг олдсон газраас 450 метрийн радиус дотор амьдардаг Коломбес дүүргийн мянга мянган оршин суугчдад орон нутгийн цагаар Ням гарагийн 13:00 цаг гэхэд гэрээ орхин явсан байх хугацаа өгсөн байна.

Мэргэжилтнүүд бөмбөгний тэслэгчийг салгаж чадаагүй тул өндөр хяналтын дор дэлбэлж устгахаар болжээ.

Дэлбэлэлт 15:20 цагт амжилттай зохион байгуулагдаж, 16:00 цаг гэхэд нүүлгэн шилжүүлэх арга хэмжээг цуцалсан байна.

Уг бөмбөг дөрөвдүгээр сарын 10-ны өдөр Шампарон гудамжинд явагдаж буй барилгын ажлын талбайгаас илэрч байжээ.

Хотын эрх баригчид өнгөрсөн хугацаанд уг газрыг хамгаалалтад авч, бөмбөгийг аюулгүй болгох ажлын бэлтгэлийг хангасан байна.

Нүүлгэн шилжүүлэлтийг хэрэгжүүлэхэд бараг 800 цагдаагийн ажилтан оролцжээ. 450 метрээс гадна нэг километрийн тойрог дотор амьдардаг иргэдэд гэртээ байхыг зөвшөөрсөн ч гадаа гарахыг нь хориглосон байна.

Нүүлгэн шилжүүлэлтэд хамрагдсан хүмүүсийг тусгай хоргодох байруудад байрлуулж, эмзэг бүлгийн хүмүүст эрүүл мэндийн тусламж үйлчилгээ үзүүлжээ.

Дайн эхэлснээс хойш 86 жил өнгөрсөн ч Европ даяар тэсрээгүй бөмбөгнүүд олдсоор байна. Тэдгээрийн ихэнх нь хот суурин газруудад барилгын ажлын үеэр олддог. Сүүлийн жилүүдэд Лондон хот даяар хэдэн арван ийм бөмбөг олдож, нэг тохиолдолд нисэх онгоцны буудлыг түр хаахад хүрч байв.

Өнгөрсөн онд Парисын Гаре ду Норд төмөр замын өртөөнд барилгын ажлын үеэр 500 кг бөмбөг олдсоныг бас аюулгүй болгох арга хэмжээ авсан юм.

Эх сурвалж: BBC

Авиа компаниуд шатахууны үнийн өсөлтөөс шалтгаалан онцгой горимд шилжиж эхлэв

zulaa — Thu, 02 Apr 2026 13:19:52 +0800

Өмнөд Солонгосын үндэсний агаарын тээвэрлэгч Korean Air тийзний шатахууны үнийн огцом өсөлтийн нөлөөг саармагжуулах зорилгоор “онцгой удирдлагын горим”-д шилжиж байгаагаа мэдэгдлээ. Энэ нь АНУ–Израилийн Ираны эсрэг хийж буй дайны улмаас дэлхийн эдийн засаг доргиж буйтай холбоотой юм.

Тус компанийн төлөөлөгч “компанийн санхүүгийн тогтвортой байдлыг хангахын тулд дотоод зардал бууруулах арга хэмжээ хэрэгжүүлнэ” гэж хэлжээ.

Энэ нь Ираны дайны эдийн засгийн нөлөөллийг даван туулахын тулд арга хэмжээ авч буй Азийн агаарын тээврийн компаниудын хамгийн сүүлийн жишээ болж байна.

Дайн эхэлсэн хоёрдугаар сарын 28-наас хойш түүхий нефтийн үнэ 50 гаруй хувиар өссөн бол дэлхийн хэмжээнд онгоцны шатахууны үнэ хоёр дахин нэмэгдээд байна.

PwC Сингапур зөвлөх компанийн шинжээч Тан Чи Сян хэлэхдээ, ийм төрлийн онцгой арга хэмжээг агаарын тээврийн компаниуд өмнө нь Ковид -19 цар тахлын үеэр мөн ашиглаж байсан гэжээ. Түүний хэлснээр Азийн компаниуд “давхар цохилт”-д өртөөд байгаа бөгөөд энэ нь дэлхийн нефтийн үнийн өсөлт болон бүс нутгийн шатахууны хомсдол юм.

Азийн улсууд ямар арга хэмжээ авч байна вэ?

Өмнөд Солонгос улс Персийн булангаас нефть их хэмжээгээр импортолдог тул эрчим хүчний нийлүүлэлт тасалдахад онцгой эмзэг байдаг. Сүүлийн өдрүүдэд Korean Air, Asiana Airlines, Air Busan зэрэг хэд хэдэн агаарын тээвэрлэгч онцгой горимд шилжээд байна.

Эдгээр арга хэмжээнд хөрөнгө оруулалт хойшлуулах, зардал танах зэрэг дотоод шийдвэрүүд багтдаг бөгөөд зарим компани нислэгийн тоог бууруулах боломжтой гэж шинжээчид үзэж байна.

Korean Air компанийн дэд дарга Ү Ки-хонг ажилтнууддаа илгээсэн санамж бичигтээ шатахууны зардал огцом өсөхөд бэлтгэж байгаагаа мэдэгдсэн байна. Тэрээр эдгээр арга хэмжээ нь “нэг удаагийн” биш, харин компанийн бүтцийн суурийг бэхжүүлэх зорилготой гэж онцолжээ.

Эх газрын Хятад ба Хонг Конг

Дэлхийн хамгийн том нефть импортлогч Хятад улс эрчим хүчний үнийн хэлбэлзэлд эмзэг хэвээр байна.

China Eastern Airlines компани геополитикийн зөрчил, дайн нь энэ жилийн үйл ажиллагаанд сөргөөр нөлөөлж болзошгүй гэж анхааруулжээ. Ираны дайн эхэлснээс хойш Хятадын олон агаарын тээвэрлэгч шатахууны нэмэлт төлбөрийг өсгөсөн байна.

Мөн дотоодын үнийг тогтворжуулахын тулд нефть боловсруулах үйлдвэрүүдэд экспорт зогсоох чиглэл өгсөн талаар мэдээлжээ.

Хонконгод Cathay Pacific бүх нислэгт шатахууны нэмэлт хураамж нэмж, тийзний үнэ огцом өссөн байна.

Япон

Япон улс нь олон улсын тээврийн төв бөгөөд онгоцны эд анги үйлдвэрлэлийн томоохон улс юм. All Nippon Airways дөрөв, тавдугаар сард олгогдох тасалбарын шатахууны нэмэгдлийг өсгөхгүй гэж мэдэгджээ.

Тус компани урьдчилан шатахууны үнэ тохиролцсон нөлөө одоогоор “хязгаарлагдмал” байна гэж тайлбарласан.

Japan Airlines шатахууны хомсдолтой холбоотой тодорхой арга хэмжээ хараахан аваагүй байна. Гэхдээ Ойрхи Дорнодын чиглэл хаагдсанаас шалтгаалан Европ руу чиглэсэн нислэгийн эрэлт нэмэгдэж, үнэ өссөн байна.

Энэтхэг

Энэтхэгийн агаарын салбар Ойрхи Дорнод руу чиглэсэн нислэгүүд цуцлагдсанаас ихээхэн хохирол амсаж байна.

Гэсэн хэдий ч эрэлт хэвээр байгаа тул Air India шинэ нислэгийн хуваарийг өдөр бүр шинэчилж байна. Энэтхэгийн иргэний нисэхийн байгууллага дотоодын нислэг энэ оны гуравдугаар сараас аравдугаар сар хүртэл 10 орчим хувиар буурна гэж таамаглажээ.

Гуравдугаар сарын 23-нд засгийн газар тийзний үнийн дээд хязгаарыг түр цуцалж, компаниудад үнийг нэмэх боломж олгосон. Мөн Энэтхэгийн компаниуд Пакистаны агаарын орон зайг ашиглахыг хориглосон шийдвэрийн улмаас нэмэлт хүндрэлтэй тулгарч байгаа юм.

Сингапур

Singapore Airlines болон түүний хямд өртөгтэй охин компани Scoot шатахууны үнийн өсөлтөөс шалтгаалан тийзний үнийг нэмэгдүүлжээ. Шатахуун нь компанийн нийт зардлын 30 орчим хувийг эзэлдэг хамгийн том зардал хэвээр байна. Гэсэн ч үнийн өсөлт нь бүх зардлыг бүрэн нөхөхгүй гэж компанийн төлөөлөгч мэдэгдсэн байна.

Сингапурын иргэний нисэхийн байгууллага 2026 оны дөрөвдүгээр сараас хэрэгжих байсан “ногоон шатахууны татвар”-ыг хойшлуулжээ. Энэ татвар нь сэргээгдэх эх үүсвэрээс гаргаж авсан тогтвортой шатахууны хэрэглээг дэмжих зорилготой байсан юм.

Бусад орнуудын арга хэмжээ

Филиппин улс гуравдугаар сарын 24-нд дэлхийд анх удаа “эрчим хүчний онцгой байдал” зарласан байна. Ерөнхийлөгч Фердинанд Маркос шатахууны хомсдлоос болж онгоцууд газардаж болзошгүй гэж анхааруулжээ.

Харин Вьетнам улс шатахууны нийлүүлэлт саатсанаас дөрөвдүгээр сараас хомсдол үүсэж болзошгүй хэмээн мэдэгдэж, Vietnam Airlines зарим дотоод нислэгээ цуцалсан байна.

Шинжээчдийн үзэж байгаагаар томоохон агаарын тээвэрлэгчид нөхцөл байдлыг даван туулах илүү боломжтой байдаг. Жишээлбэл Singapore Airlines Лондон руу хийдэг нислэгээ нэмэгдүүлсэн бол Qantas Airways Европ руу чиглэсэн нислэгээ нэмэгдүүлжээ.

Харин нөгөө талд Jetstar зэрэг жижиг компаниуд нислэгээ танахад хүрч байна.

Alton Aviation Consultancy-ийн шинжээч Брайан Терри хэлэхдээ, хуучин онгоц ашигладаг жижиг компаниуд шатахуунд илүү их өртдөг тул хамгийн их дарамтанд орж байна гэжээ. “Тэдэнд хямралыг даван туулахад ашиглах боломжит арга хэрэгсэл цөөн байна” гэдгийг ч мөн онцолсон байна.

Японы Формула-1 тэмцээнд Антонелли түрүүллээ

zulaa — Thu, 02 Apr 2026 10:33:05 +0800

Японы "Формула-1"-ийн Гран При тэмцээн гуравдугаар сарын 29-нд Сүзүка тойрог замд болж, Италийн залуу нисгэгч Андреа Кими Антонелли түрүүллээ.

Мерседес багийн нисгэгч Антонелли уралдааны эхэнд байр алдаж зургаадугаар байр хүртэл ухарсан ч уралдааны дунд үеэр аюулгүйн машины горим ашигласан стратегийн давуугаар дахин тэргүүлж, улмаар 13 секунд гаруй давуугаар барианд орсон байна. Энэ ялалт нь түүний улирлын дараалсан хоёр дахь ялалт болж, аваргын онооны хүснэгтийг тэргүүлэх боломж бүрдүүлжээ.

Хоёрдугаар байрт Макларен багийн Оскар Пиастри орсон бол гуравдугаар байрт Феррари багийн Шарль Леклер барианд орсон байна. Харин Жорж Рассел дөрөвдүгээр байр эзэлж, Ландо Норрис тавдугаар байрт оржээ. Өмнөх улирлын аваргуудын нэг Макс Ферстаппен энэ удаа наймдугаар байрт барианд орсон байна.

2026 оны улирлын эхний гурван уралдааны дараа Мерседес баг хүчтэй эхлэл үзүүлж, залуу нисгэгч Антонелли аваргын онооны төлөөх тэргүүлэгчдийн нэг болж эхэллээ.

Ийнхүү Японд болсон "Формула-1" тэмцээн залуу нисгэгчийн ялалтаар өндөрлөснөөр 2026 оны улирлын аваргын төлөөх өрсөлдөөн улам ширүүсэх дохио боллоо.

Японы Сүзүка тойрог зам нь "Формула-1" тэмцээний хувьд хамгийн хүнд замуудын нэгт тооцогддог. Наймын тооны хэлбэрийн бүтэцтэй, нарийн эргэлтүүд хосолсон энэ зам нисгэгчдийн ур чадвар, багуудын стратегийг хамгийн их сорьдог гэдгээрээ алдартай.

Йеменд чимээгүй өлсгөлөн нүүрлэж байна

zulaa — Fri, 20 Mar 2026 10:38:12 +0800

Даян дэлхийн анхаарал дайн дажинд төвлөрч байх зуур Йеменд чимээгүй өлсгөлөн нүүрлэж байна. Тус улсын хүн амын тал хувь нь өлсгөлөнд нэрвэгдээд байгаа ч үүнийг тоож, авч хэлэлцэж байгаа хэн ч алга. 2026 оны эхэн үеийн байдлаар тус улсын 18 сая гаруй хүний хүнсний аюулгүй байдал алдагдаад байна. Асуудлын цар хүрээг арай өөрөөр тайлбарлавал, Нидерландын хүн ам нийтээрээ өлсгөлөнд нэрвэгдээд байна гэсэн үг.

Олон улсын аврах хороо өнгөрсөн жил тус улсад судалгаа хийхэд бараг хүн бүр хоол хүнсийг нэн тэргүүний хэрэгцээтэй зүйлээр нэрлэжээ. Мөн нийт айл өрхийн 80 орчим хувь нь өлсгөлөнгийн хурцадмал хэлбэрт нэрвэгдээд байгааг тогтоожээ. Айл өрхүүд талх, ус төдийхнөөр нь амь зогоож, эцэг эхчүүд хүүхдээ өлсгөхгүйн тулд өөрсдөө хоосон хонож байна.

Хүнсний аюулгүй байдлын нэгдсэн шатлалын ангилал буюу улс орон, бүс нутагт хүмүүс хэр хэмжээнд өлсгөлөнд өртөж байгааг үнэлдэг таван шатлалт систем бий. Уг системээр Йемений дахин нэг сая хүн ам 3+ шатлалын өлсгөлөнд нэрвэгдэх эрсдэлтэй байна. Энэ шатлалд байгаа айл өрхүүд өдөр тутамдаа хооллож чадахгүй, өр зээл тавьж, эд зүйлээ зарахаас өөр аргагүйд хүрдэг. Мөн энэ шатанд хүүхдүүд хоол тэжээлийн дутагдалд орж, энгийн өвчин үхлийн аюултай болох нь бий.

Ирэх хоёр сарын хугацаанд Йемений дөрвөн ч дүүрэгт нөхцөл байдал улам хүндрэх төлөвтэй байна.

Йемен улс хүнсний бүтээгдэхүүнийхээ тун бага хувийг өөрсдөө үйлдвэрлэдэг. Хэрэглээний үр тарианы 80-90 хувь нь импортоос хамааралтай байдаг. Гэвч олон жилийн турш үргэлжилсэн зөрчилдөөн, эдийн засгийн уналтаас болж бүтцийн гажуудал тус улсад үүсээд буй. Мөн уур амьсгалын өөрчлөлтөөс үүдэлтэй хур тунадасны хэмжээ, хэт халалт ч хөдөө аж ахуйн бүтээгдэхүүний гарцад нөлөөлж байна.

Ангалын ирмэгт удаан хугацаанд оршин тогтнож буй Йемен улсыг нэгэн цагт хүмүүнлэгийн санхүүжилт авардаг байлаа. Гэвч сүүлийн жилүүдэд хүмүүнлэгийн санхүүжилт эрс багасч, эдийн засгийн уналт, уур амьсгалын өөрчлөлт, цэргийн ажиллагаа хавсарснаар сая сая хүний амь эрсдэлд ороод байна.

ЭХ СУРВАЛЖ: AL JAZEERA

Газрын тосны үнэ өсөж, хувьцааны ханш унав

zulaa — Thu, 12 Mar 2026 09:23:40 +0800

Иранд явуулж буй цэргийн ажиллагаанаас шалтгаалж зах зээл дээрх газрын тосны үнэ өсөж, голлох хувьцаануудын ханш уналаа. Ойрх Дорнодын бүс нутагт тээвэрлэлтийн асуудал үүссэний улмаас брент маркийн газрын тос үнэ баррель тутамдаа 80 ам.доллароос даваад байна. Ялангуяа Ормузын хоолойг хаасан нь өдөрт 15 сая баррель газрын тосны нефтийн тээвэрлэлт зогсоно гэсэн үг. ОУВС болон санхүүгийн бусад байгууллагууд газрын тосны үнийн өсөлт нь дэлхий даяар инфляцын дарамтыг нэмэгдүүлнэ гэж дүгнээд байна. Хэдийгээр ОПЕК+ орнууд ням гарагт хуралдахдаа дөрөвдүгээр сард өдөрт 206 мянган баррель газрын тос нийлүүлэхээр нэмэгдүүлсэн боловч уг газрын тосны дийлэнх хэсгийг Ойрх Дорнодоос нийлүүлэх шаардлагатай юм.

Цэргийн ажиллагаа хөрөнгийн зах зээлд сүүдэр тусгалаа. Европын “EUROSTOXX 50” хувьцааны фьючерс 1.9%, “DAX” 1.8% буурсан бол “S&P 500” болон “Nasdaq” индексүүд 1.1% буурчээ. Азийн томоохон хувьцаануудын нэг Японы “Nikkei” индекс хамгийн их буюу 2.2% унаад байна.

Шинэчлэлийг цогцоор нь гүнзгийрүүлж, өндөр түвшний нээлттэй байдлыг өргөжүүлэх нь

otgoo — Thu, 05 Mar 2026 14:43:54 +0800

”14-р таван жилийн төлөвлөгөө”-ний хугацаанд (2021-2025) Хятадын эдийн засаг, нийгмийн хөгжил, шинэ ахиц дэвшил, нээлтийн өөрчлөлт, түүхэн ололт амжилтад хүрч, дэлхий нийтийн анхаарлыг татсан байна.

"14-р таван жилийн төлөвлөгөө"-ний хугацаанд (2021-2025) Хятадын эдийн засаг, нийгмийн хөгжил шинэ ахиц дэвшил, нээлтийн өөрчлөлт, түүхэн ололт амжилтад хүрч, дэлхий нийтийн анхаарлыг татсан байна.

“14-р таван жилийн төлөвлөгөө”-ний хугацаанд Хятадын шинэчлэл, нээлттэй байдал шинэ үсрэлт хийж, Хятад маягийн шинэчлэл үргэлжилсээр байгаа юм. Сүүлийн таван жилийн хугацаанд эргээд харахад Хятад улс цогц шинэчлэлийг улам гүнзгийрүүлж, өндөр түвшний нээлттэй байдлыг тасралтгүй өргөжүүлэн, хөгжлийн эрч хүчийг хуримтлуулж, дотоод хөдөлгөгч хүч, ирээдүйн өсөлтийн боломжийг бэхжүүлсэн юм.

Энэ бол Гуандун мужийн Шэньжэнь хотын Наньшань дүүрэгт байрлах Шэньжэнь булангийн спортын төв болон түүний ойр орчмын барилгууд

Нефть химийн түүхий эд ачсан гадаадын хөлөг онгоц 2025 оны 12-р сарын 18-нд SDIC Янпү газрын тос хадгалах терминалын 300,000 тонн түүхий газрын тосны зогсоол дээр зогсов

Энэ бол Бээжин дэх Үндэсний Хурал Төвийн ойролцоо авсан 2024 оны Хятад, Африкийн хамтын ажиллагааны форумын лого юм

Хятадын Олон улсын импортын Ⅷ экспо (CIIE)-ний байршил болох Үндэсний Үзэсгэлэн, Хуралын Төв (Шанхай)-ийн дүр зураг

Өвөр Монголын Ордос хотын Дүншэн дүүргийн Засгийн газрын үйлчилгээний төвд ажилтнууд хувийн аж ахуйн нэгжүүдтэй холбоотой бизнесийг боловсруулсан

Оролцогчид 2025 оны 09-р сарын 24-нд 2025 оны Хятадын хувийн аж ахуйн хөрөнгө оруулалт, санхүүжилтийн бага хурлын байранд орлоо

Жэжян мужийн Тайжөү хот дахь Жак Технологи ХК-ийн төв байранд лабораторийн инженерүүд ухаалаг оёдлын машины чимээг хагас чимээгүй камерт туршиж байна

Ажилчид Шиньбао группийн дуслын кофены машины үйлдвэрлэлийн шугам дээр ажиллаж байна

Гэр бүлээ аврахын тулд 13 настай хүү дөрвөн цаг далайд сэлж тусламж дууджээ

zulaa — Fri, 06 Feb 2026 10:30:10 +0800

Австралийн эргийн ойролцоох далайд ээж дүү нар нь хүнд байдалд орох үед тусламж дуудахаар олон цагийн турш сэлж, тусламж дуудан амь насыг нь аварчээ.

Баруун Австралийн Перт хотоос ирсэн уг гэр бүл амралтаараа аялж яваад, үд дунд орчимд зочид буудлаасаа түрээсэлсэн каяк болон сэлүүрт тавцанг ашиглаж байхад далайн ширүүн давалгаа, салхи тэднийг аажмаар тэнгисийн гүн рүү татаж эхэлсэн байна.

Цагдаагийн мэдээлснээр, Остин Апплби баасан гарагт ээж Жоанн Апплби болон 12 настай дүү Бо, 8 настай дүү Грейс нарын хамт далайд хүнд нөхцөл байдалд орсон бөгөөд тусламж дуудах зорилгоор Остин 4 км сэлж байж эрэгт хүрсэн байна. Тэр хэвлэлд "Сэлж байхдаа би толгойдоо хамгийн аз жаргалтай зүйлсийг төсөөлж, муу бодлуудад автахгүй, тэсэж гарахыг хичээсэн. Ээжийгээ, хоёр дүүгээ бодсон" хэмээн хэлжээ. Naturaliste Marine Rescue байгууллагын командлагч Пол Бресланд ярилцлагадаа Остины талаар "Зүгээр л супер хүү. Том хүний гаргаж чадах тэвчээрээс ч илүүг хийсэн" гэсэн юм. Остин эхний хоёр цагийг аврах хантаазтай сэлсэн бөгөөд цааш хурдан сэлэхэд нь хантааз саад болж байсан учир тайлж орхиод, дараагийн хоёр цагийг аврах хантаазгүйгээр сэлж эрэгт хүрчээ.

Улмаар эрэн хайх нисдэг тэрэг оройн 8:30 цагийн үед ээж болон хоёр хүүхдийг аврах хантаазтай, сэлүүрт тавцан дээр хэвтсэн байдалтайгаар олсон байна. Тэд Баруун Австралийн Куиндалуп суурингаас 14 километр зайд хөвж, нийтдээ 10 орчим цагийг усанд өнгөрүүлсэн аж.

Өмнөд Солонгосын Ерөнхийлөгч асанд цаазын ял төлөвлөжээ

zulaa — Thu, 15 Jan 2026 12:09:20 +0800

Өмнөд Солонгосын прокурорын газрын тусгай зөвлөл тус улсын Ерөнхийлөгч асан Юн Суг Ёлыг албан тушаалаа урвуулан ашиглах замаар бослого үйлдсэн хэргээр цаазын ял төлөвлөжээ. Ингэснээр тус улсын түүхэнд ийм төрлийн хэргээр цаазын ял сонссон хоёр дахь ерөнхийлөгч болж байна.

Энэ талаар тусгай зөвлөх Чо Ын Сок хэлэхдээ “Үндсэн хуулиар тогтоосон хэм хэмжээг ноцтой зөрчсөн хэрэг юм” гэжээ.

Ерөнхийлөгч асан Юн Суг Ёлоос гадна цагдаагийн өндөр албан тушаалын долоон хүнийг буруутгаж байна. Түүнчлэн Батлан хамгаалахын сайд асан Ким Ён Хёнд бүх насаар нь хорих ял, Батлан хамгаалах тагнуулын командлагч асан Но Сан Вонд 30 жилийн хорих ял, Үндэсний цагдаагийн газрын дарга асан Чо Жи Хо-д 20 жилийн хорих ял төлөвлөсөн байна.

Тусгай зөвлөл Юн Суг Ёл тэргүүтэй эдгээр өндөр албан тушаал хашиж байсан хүмүүс нь цэргийн дэглэм тогтоох замаар, үндэсний аюулгүй байдалд ноцтой аюул занал учруулсан гэж үзэж байгаа юм.

Өмнөд Солонгосын Үндсэн хуулийн шүүх өнгөрсөн оны 12-р сарын 3-ны өдөр хуралдаж хууль бусаар цэргийн дэглэм тогтоосноос Үндсэн хуулийн хэм хэмжээг алдагдуулж, улмаар бослого гаргасан гэж үзсэн юм. Түүгээр ч зогсохгүй өрсөлдөгч намын удирдлагууд, Үндэсний ассамблейн даргыг баривчлахыг завдсан гэж үзсэн юм.

Юн Суг Ёл нарт холбогдох хэргийн шүүх хурал ирэх сарын 19-ний өдөр товлогджээ.

АНУ хоригоо цуцалж, Беларусь хоригдлууд суллалаа

zulaa — Mon, 15 Dec 2025 12:30:03 +0800

АНУ-ын Ерөнхийлөгч Доналд Трампын элч Жон Коалегийн зуучилсан хэлэлцээгээр Беларусийн Ерөнхийлөгч Александр Лукашенко бямба гарагт /2025.12.13/ 123 хоригдол сулласан байна. Суллагдсан хүмүүсийн дунд Нобелийн Энх тайвны шагналтан Алес Беляцкий, сөрөг хүчний удирдагч Мария Калесникава нар багтжээ.

Хариуд нь АНУ Беларусийн калийн давсанд тавьсан хоригоо цуцлав. Кали нь бордоонд ордог гол бүрэлдэхүүн хэсэг юм. Беларусь нь калийн давсны дэлхийд тэргүүлэгч үйлдвэрлэгч орон. Трамп энэ жил ажлаа хүлээн авснаасаа хойш Беларусьтай хэлэлцээ эхлүүлсэн. Лукашенко эсэргүүцлийн жагсаалыг дарж, ОХУ-ын Украинд хийж буй дайныг дэмжсэн тул барууны орнууд түүнтэй хэлэлцээ хийхгүй гэх байр суурьтай байдаг.

Коале “Reuters” агентлагт хэлэхдээ “Үлдсэн улс төрийн хоригдлуудыг суллаж чадна гэж би бодож байна. Хэрвээ нэг ч улс төрийн хоригдол үлдээлгүй суллавал хоригийн ихэнхийг цуцалж болно. Энэ нь шударга солилцоо гэж би бодож байна” хэмээжээ.

Эх сурвалж: Reuters

Ли Жэ Мён: Манай ард түмэн Нобелийн Энх тайвны шагналыг хүртэх эрхтэй

zulaa — Wed, 03 Dec 2025 15:57:02 +0800

СӨҮЛ, 2025 оны арванхоёрдугаар сарын 3 /TASS/. Өмнөд Солонгосын иргэд 2024 оны 12 дугаар сарын 3-нд онц байдал тогтоох оролдлогыг тайван замаар зогсоосныхоо төлөө Нобелийн энх тайвны шагналыг хүртэх эрхтэй гэж тус улсын Ерөнхийлөгч Ли Жэ Мён мэдэгджээ.

“Хууль бусаар тогтоосон онц байдал цуцлагдаж, шударга бус эрх баригчдыг түлхэн унагасан. Энэ үйл явдал дэлхийн ардчиллын түүхэнд тэмдэглэгдэн үлдэнэ” гэж Ли Жэ Мён хэлсэн байна.

Тэрбээр өмнөх Ерөнхийлөгч Юн Сог Ёль өнгөрсөн оны 12 дугаар сарын 3-нд онц байдал зарласныг дурдсан бөгөөд уг шийдвэрийг парламент 12 дугаар сарын 4-нд цуцалсан юм. Улмаар Юн Сог Ельд импичмент зарласан бөгөөд өнгөрсөн дөрөвдүгээр сард Үндсэн хуулийн цэц түүнийг албан тушаалаас нь огцруулж, онц байдал зарласан нь Үндсэн хуулийг зөрчсөн гэж үзсэн билээ.

“Ардчилалд учирсан аюул заналыг тайван замаар даван туулсан Өмнөд Солонгосын ард түмэн Нобелийн энх тайвны шагнал хүртэх эрхтэй. Ийм үйл явдал түүхэнд урьд өмнө тохиож байгаагүй” гэж Ли Жэ Мён онцолсон байна.

"Гэрлийн хувьсгал"-ын ачаар бий болсон ард түмний бүрэн эрхийг хэрэгжүүлэгч засгийн газраас 12 дугаар сарын 3-ны өдрийг манай агуу ард түмний эр зоригийг бэлгэдэж, Ард түмний эрх мэдлийн өдөр болгон тэмдэглэх болно” гэж Өмнөд Солонгосын удирдагч мэдэгджээ. Ли Жэ Мён 2025 оны зургаадугаар сард болсон сонгуулиар Ерөнхийлөгчөөр сонгогдсон юм.

Д.Жаргал

Эх сурвалж: "Монцамэ" агентлаг